विश्व संवाद केंद्र वृत्तसेवा (team vsk)
1 day ago
साताऱ्यात ‘इस्लाम समजून घेताना’ विषयावर अभ्यासपूर्ण व्याख्यान; २८० हून अधिक महिलांची उपस्थिती
गिर्यारोहक साक्षी प्रभुणे हिचा विशेष सत्कार
सातारा | २० जुलै २०२६:
राष्ट्र संवर्धन संस्था आणि ‘महिला समन्वय’ यांच्या संयुक्त विद्यमाने नुकतेच साताऱ्यात "इस्लाम समजून घेताना" या विषयावर प्रबोधनात्मक व्याख्यानाचे आयोजन करण्यात आले होते. या वेळी प्रमुख वक्त्या आणि इस्लामचे अभ्यासक विशाल देशपांडे यांनी सखोल मार्गदर्शन केले.
देशपांडे यांनी इस्लाम धर्माची स्थापना, त्याचा मूळ उद्देश, तसेच कुराण व इतर धार्मिक ग्रंथांमधील विविध संकल्पनांचा चिकित्सक व सखोल ऊहापोह केला. व्याख्यानानंतर रंगलेल्या मोकळ्या प्रश्नोत्तरांच्या तासात महिलांनी विचारलेल्या विविध शंकांचे त्यांनी निरसन केले. जवळपास दोन तास चाललेल्या या अभ्यासपूर्ण कार्यक्रमातून उपस्थितांना विषयाचे नेटके व सखोल आकलन झाले.
- साक्षी प्रभुणेचा विशेष सन्मान
कार्यक्रमाला सातारा जिल्हा परिषदेच्या अध्यक्षा डॉ. प्रिया शिंदे यांची प्रमुख उपस्थिती लाभली होती. हिमालयातील ६,००० मीटरपेक्षा जास्त उंचीचे अतिशय कठीण मानले जाणारे ‘माऊंट मेन्टोक कांगरी’ हे शिखर यशस्वीरीत्या सर केल्याबद्दल कु. साक्षी प्रभुणे हिचा व्यासपीठावर मान्यवरांच्या हस्ते विशेष नागरी सत्कार करण्यात आला. या प्रसंगी व्यासपीठावर राष्ट्र संवर्धन संस्थेचे अध्यक्ष गोविंदराव लेले, सचिव अशोक रेमजे तसेच ‘महिला समन्वय’च्या आसावरी इनामदार उपस्थित होत्या.
कार्यक्रमाचे प्रास्ताविक डॉ. शीतल इनामदार यांनी केले, तर सूत्रसंचालन वैदेही कुलकर्णी यांनी अतिशय ओघवत्या शैलीत भूषवले. शेवटी सुप्रिया हुद्दार यांनी आभार मानले. या प्रबोधनात्मक उपक्रमाला साताऱ्यातील विविध क्षेत्रांतील २८० हून अधिक महिलांनी उत्स्फूर्त उपस्थिती लावून कार्यक्रमाला उत्तम प्रतिसाद दिला.
- विश्व संवाद केंद्र वृत्तसेवा (team vsk)
Share With Friends
अभिप्राय
अभिप्राय लिहा
