विश्व संवाद केंद्र - पुणे
20 days ago
बातम्या विज्ञान आणि तंत्रज्ञान
पुणे, दिनांक २३ ऑक्टोबर ः कात्रज परिसरातील आंबेगाव येथे बालगोकुलम्, लेक विस्टा सोसायटी आणि विज्ञान भारती यांच्या संयुक्त प्रयत्नातून स्पेस ऑन व्हिल हे प्रदर्शन बुधवारी (ता. २३) आयोजित करण्यात आले होते. मोठ्या संख्येने प्रदर्शन पाहण्यास आलेल्या विद्यार्थी, पालक तसेच शिक्षक गणांची बैठक व्यवस्था लेक विस्टा सोसायटीच्या क्लब हाऊस मध्ये करण्यात आलेली होती. एका वेळेस १० ते १२ विद्यार्थी स्पेस ऑन व्हील्स प्रदर्शनीय बस मध्ये प्रवेश करून इस्रोच्या विविध अंतराळयान आणि उपग्रहांच्या मॉडेल्सची माहिती घेतली.
या प्रदर्शनात एसएलव्ही तीन, एएसएलव्ही, डीएसएलव्ही, जीएसएलव्ही, आर्यभट्ट, रोहिणी, भास्करा, आदी उपग्रहे आणि प्रक्षेपक यानांची माहिती घेतली. विद्यार्थ्यांबरोबर पालकांनीही याचा आनंद लुटला. क्लब हाऊसमध्ये प्रतीक्षा कालावधीत विद्यार्थ्यांची प्रश्न मंजुषा घेऊन बक्षिसे देण्यात आली. रात्री ८.३० वाजता आभार व्यक्त करून प्रदर्शनाची सांगता झाली. परिसरातील पाच शाळांमधील जवळपास १४०० विद्यार्थी आणि शिक्षक वृंद तसेच आसपासच्या अनेक सोसायट्यांमधील ८०० नागरिकांनी या प्रदर्शनास भेट दिली. लेक विस्टा सोसायटी मधील ४८ नागरिकांनी तसेच ३१ महाविद्यालयीन स्वयंसेवकांनी प्रदर्शनाच्या व्यवस्थेचे काम पाहिले.
राष्ट्रीय स्वयंसेवक संघाचे कात्रज भाग माननीय संघचालक शिवाजीराव मालेगावकर, आंबेगाव नगर माननीय संघचालक गणेश पाठक आणि विज्ञान भारती संस्थेचे पश्चिम महाराष्ट्र सचिव डॉ. कौस्तुभ साखरे आदी मान्यवरांनी या प्रदर्शनास विशेष भेट दिली. बाल गोकुलम् कात्रज भाग समन्वयक सचिन डांगे, भाग सह संयोजक मेधावी राजवाडे, नगर संयोजक अमित कोल्हार, नगर सह संयोजक पूनम कुलकर्णी, सर्व बालगोकुलम शिक्षक तसेच लेक विस्टा सोसायटीचे सर्व कमिटी सदस्य आणि विविध शाळांतील शिक्षक यांनी हे प्रदर्शन यशस्वी होण्यासाठी विशेष परिश्रम घेतले.
--------------
- विश्व संवाद केंद्र - पुणे
Share With Friends
अभिप्राय
अभिप्राय लिहा
